शाळेच्या पहिल्याच दिवशी
घरी परतताना आईने केली चौकशी
नव्या मैत्रिणींची
त्यांच्या आडनावासहित
आणि मग तिनेच ठरवलं
मी कुणाशी मैत्री करावी...
आपला डबा कुणासोबत खावा
हे सांगतानाच
ती शिकवत गेली अनाहूतपणे
कुणाच्या डब्यातलं खाऊ नये.
मी कधी कारण विचारलं नाही.
तिने विचारल्याशिवाय सांगितलं नाही.
इयत्तामागून इयत्ता वाढत गेल्या
आणि कळत गेलं
आपण शाळेत शिकण्यासाठी जातो
फक्त तेवढंच जेवढं पुस्तकात आहे
कोणताही अभ्यासेतर उपक्रम
आपल्यासाठी नाही.
त्यासाठी वेगळे विद्यार्थी आहेत.
मग मात्र मी कारण विचारलं आईला,
“जी संधी त्यांना मिळते ती मला का नाही?"
आणि यावेळी मात्र
आई निरूत्तर....
कोणत्याही टिप्पण्‍या नाहीत:
टिप्पणी पोस्ट करा