शुक्रवार, २ जानेवारी, २०१५

रखुमाई रुसली



सावळ्या हरीऐकू या  तरी
काय झाला रुसायला
रखुमाई रुसली, कोपऱ्यात बसली
चला जावू पुसायला …………

सांगा सांगा रखुमा आई
विठोबा दादानं खोड केली काही
कान धरून सांगू उठाबशा काढायला
काय झालं रुसायला
रखुमाई रुसली, कोपऱ्यात बसली
चला जावू पुसायला …………

असा कसा हा तुमचा हरी
नुसताच उभा विटेवरी
युगं लोटली कितीतरी
नाही तयार अजुनी खाली उतरायला
काय झालं रुसायला
रखुमाई रुसली, कोपऱ्यात बसली
चला जावू पुसायला …………

विठू तुमचा लेकुरवाळा
सदा भोवती गोतावळा
सारी याच्या कडेवरी
मी तरी पडणार किती पुरी
रांधून लागले हात माझे दुखायला
काय झालं रुसायला
रखुमाई रुसली, कोपऱ्यात बसली
चला जावू पुसायला …………

कोण कुठला तो तुकोबा वाणी
त्याने काय लिहिली चार दोन गाणी
म्हणून काय हो विमान धाडायचं
फुकटात बसायला
रखुमाई रुसली, कोपऱ्यात बसली
चला जावू पुसायला …………

हा भक्तांचा कैवार घेतो
गोऱ्यासाठी चिखल होतो
जनीसाठी जातो दळण दळायला
अन पुस्ताय काय झालं रुसायला
रखुमाई रुसली, कोपऱ्यात बसली
चला जावू पुसायला …………




कवी अज्ञात 

कोणत्याही टिप्पण्‍या नाहीत:

टिप्पणी पोस्ट करा