पाऊस म्हणजे नेमका काय असतो रे?
का म्हणतात त्याला पृथ्वीचा भ्रतार?
आठ महिन्यांचा विरह देऊन,
चार महिने तिला यथेच्छ झोडपणारा
हा अमानुष पाऊस,
का रे कवींना मनभावन वाटत असेल?
सांग ना सख्या...
तुला का आवडतो पाऊस?
तुला पाहायला आवडते
झाडांची तांबूस पालवी,
मात्र त्या पालवीआड
लपवली असेलही कदाचित
त्या झाडाने आपली
भूतकाळातील वेदना...
कि तुझ्यालेखी वेदनेला
कधी पालवीच फुटत नाही?
खरं सांगू,
मलाही आवडतो पाऊस,
का माहित आहे?
तुझ्यासोबत भिजताना
डोळ्यातून ओघळणारे अश्रू
तो अलगदपणे लपवतो,
आणि म्हणूनच
माझ्या ओठावर तुझ्यासाठी हसू येतं.
कोणत्याही टिप्पण्‍या नाहीत:
टिप्पणी पोस्ट करा