एका अज्ञात जगातून ती येते
माझा शोध घेते
मलाच न गवसलेली मी
माझ्याही नकळत
तिच्या स्वाधीन होते...
तिच्याकडे असते
एक गूढ शक्ती
माझा मनाचा ताबा घेत असताना
ती सुन्न करत जाते
माझी विचारबुद्धी...
ती मग ठाण मांडते
माझ्याच अंतर्मनात,
आणि घोंगावत राहते वावटळीसारखी..
खूप खूप अस्वस्थ वाटतं..
वाटतं,
वाटतं स्वतःचंच काळीज चिरून
तिला बाहेर काढावं,
म्हणावं
बाई गं,
थकले मी,
आता तरी मला मुक्त कर.....
पण ती आलेली असते,
स्वतःचा स्वतंत्र स्वभाव घेऊन,
ती मला नाचवते तिच्या इशाऱ्यावर,
खेळवत राहते ती मला
तिच्या मर्जीप्रमाणे...
स्वतःच सारं काही तिला बहाल केल्यावर
मी उरतच नाही माझ्यासाठी माझ्यापाशी
ती अशी छळायला लागली
म्हणजे जाणीव होते
अरे आपण कवी झालो....
अरे आपण कवी झालो....
कोणत्याही टिप्पण्या नाहीत:
टिप्पणी पोस्ट करा