नको...

आता नव्या यशाची

मला ही वाटचाल नको,

नाही करणार सवाल काही

मजलाही सवाल नको...

एकदा विकून सारे

आयुष्य बैसले मी,

आता या बाजाराचे

पुन्हा नवे दलाल नको...

अंधाराची वाट सारी

रक्ताळले पाय माझे,

ठेच लागली पुन्हा तरी

मदतीला मशाल नको...

निबर झाले मन माझे

पाषाण झाल्या भावना,

नाही पाणावणार डोळे

नको मला रुमाल नको...

तक्रार नाही कुणाजवळही

फिर्याद मी करीतच नाही,

आता मजला कुणाचाही

कसलाही निकाल नको...

केव्हाच मंद झाली

या हृदयाची स्पंदने,

आता या देहाचीही

पुन्हा नवी हालचाल नको...