सूर्य उगवतच नसतो कधी,
कधी होतच
नसतो सूर्यास्त,
कधी
कलतही नाही तो
आणि होतच
नाहीत कधी
दिवस
लहान आणि मोठे...
परिवलणारी पृथ्वी
कलते, फिरते, बदलते
आणि सूर्याभोवती
फिरता फिरता
देते संज्ञा
सूर्योदय,
सूर्यास्त,
उत्तरायण,
दक्षिणायन,
आणि अशा इतर अनेक...
पृथ्वीवरच्या
अनंत मुखांनी,
आपल्या
मेंदूची कवाडं
बंद करून,
बेंबीच्या
देठापासून,
ओरडून
ओरडून सांगितलं,
तरी कधीच
बदलणार नसतं सत्य,
सूर्य उगवतच नसतो कधी,
कधी होतच नसतो सूर्यास्त...
कोणत्याही टिप्पण्‍या नाहीत:
टिप्पणी पोस्ट करा