ब्रह्मांडाच्या नाक्यावर....

ब्रह्मांडाचा नाका आजकाल सुनसुना,

कुणाचीच काही धावपळ नाही,

search engineच्या जगात 
सगळं काही सोप्प झालंय नाही का?

आता जुने शब्द घेऊन 
नव्या अर्थांच्या शोधात 
भटकावं नाही लागत.

इथे प्रत्येक clickसरशी 
जुन्या अर्थांचे अनेक नवे शब्द तयारच असतात.

दळणवळणही आता किती सुसह्य झालंय,

सुसह्यच कशाला आता तर प्रवासच उरला नाहीये

अनुभवापासून अनुभूतीपर्यंतचा...

आजकाल सारं काही operate होतं  automatically ,

आणि सहज ठेवला जातो विश्वास desktopच्या displayवर...

मनाची window close करून आपण open करतो internet,

आणि Copy pastच्या तंत्राने होत राहते नवनिर्मिती...

Like आणि shareने लाडावलेले निर्मिक जेव्हा देत असतात

जुन्या अर्थांना नवा जन्म,

नेमका त्याचवेळी,

कुणी अनामिक वेडा,

नव्या अर्थांचा आर्ततेने शोध घेत

उभा असतो

ब्रह्मांडाच्या नाक्यावर....