रिमझिम वर्षासरी
मेघ घेऊन हे आले,
मन तृप्त माझे
चिंब पावसात न्हाले...
काळ्या आभाळी भरला
मातीचा रंग ओला,
भग्न धरीत्रीच्या संगे
देह माझा सुखावला ...
हिरव्या रंगात नटले
पर्वतराज दूरवर,
गार वाऱ्यासंगे आली
पावसाची मुग्ध सर ...
पाचोळा गिरक्या घेत
दूर उडून चालला,
कुणी तृषार्त चातक
अमृतरस प्याला ...
काळे मेघ हे दाटले
आज आकाशा अंगणी,
दारातल्या पाण्यासंगे
उभे डोळ्यातही पाणी ...
कोणत्याही टिप्पण्या नाहीत:
टिप्पणी पोस्ट करा