कवडीमोल आहे मी खंत
याची करू नकोस
आयुष्याच्या
वळणावरती वाट माझी पाहू नकोस...
मी आहे स्वच्छंदी,
मी आहे मोकळ्या मनाची
चिंता कसलीच नाही
मला ना आजची ना उद्याची
म्हणून तर या नदीला
बांध कधी घालू नकोस,
आयुष्याच्या
वळणावरती वाट माझी पाहू नकोस...
खळाळता निर्झर मी,
मी आहे शांत सागर
ऋतुचक्र फिरूनही तोच
ओसाड वावर
सवय आहे याची मला तू
पाऊस बनून येऊ नकोस,
आयुष्याच्या
वळणावरती वाट माझी पाहू नकोस...
जीवनसागरी उठल्या न
जाणो किती उंच लाटा
साऱ्यांसाठी बंद
केल्या मीच माझ्या मनाच्या वाटा
ऐकू येणार नाही मला
तू साद पुन्हा घालू नकोस,
आयुष्याच्या
वळणावरती वाट माझी पाहू नकोस...
कोणत्याही टिप्पण्‍या नाहीत:
टिप्पणी पोस्ट करा