तुका म्हणे ७

कोटी जन्म पुण्य साधन साधिले । तेणे हाता आले हरिदास्य ॥१॥

रात्रीं दिवस ध्यान हरीचे भजन । काया वाचा मन भगवंती ॥ध्रु॥

ऐसिया प्रेमळा म्हणताती वेडा । संसार रोकडा बुडविला ॥२॥

रात्रीं दिवस ध्यान हरीचे भजन । काया वाचा मन भगवंती ॥ध्रु॥

एकवीस कुळे जेणे उद्धरिली । हे तो न कळे खोली भाग्यमंदा ॥३॥

रात्रीं दिवस ध्यान हरीचे भजन । काया वाचा मन भगवंती ॥ध्रु॥

तुका म्हणे त्याची पायधुळी मिळे । भवभय पळे वंदिताची ॥४॥

रात्रीं दिवस ध्यान हरीचे भजन । काया वाचा मन भगवंती ॥ध्रु॥

४३५० पृष्ठ ७१०(शासकीय)

तुका म्हणे ६

ब्रम्हज्ञान जरी एके दिवसी कळे । 

तात्काळ हा गळे अभिमान ॥१॥

अभिमान लागे शुकाचिये पाठी । 

व्यासे उपराटी दृष्टी केली ॥२॥

जनक भेटीसी पाठविला तेणे । 

अभिमान नाणे खोटे केले ॥३॥

खोटे करूनिया लाविला अभ्यासी । 

मेरु शिखरासी शुक गेला ॥४॥

जाऊनिया तेणे साधिली समाधी । 

तुका म्हणे तधी होतो आम्ही ॥५॥

३३३३ पृष्ठ ६१४ (देहूकर सांप्रदायिक), २४७८ पृष्ठ ४२१(शासकीय)

तुका म्हणे ५

मागे बहुता जन्मी । हे चि करित आलो आम्ही ।

भवतापश्रमी । दुःखे पीडिली निववू त्या ॥१॥

गर्जो हरिचे पवाडे । मिळो वैष्णव बागडे ।

पाझर रोकडे । काढू पाषाणामध्ये ॥धृ॥

भाव शुध्द नामावळी । हर्षे नाचो पिटू टाळी ।

घालू पाया तळी । कळिकाळ त्याबळे ॥२॥

गर्जो हरिचे पवाडे । मिळो वैष्णव बागडे ।

पाझर रोकडे । काढू पाषाणामध्ये ॥धृ॥

कामक्रोध बंदखाणी ।तुका म्हणे दिले दोन्ही ।

इंद्रियांचे धनी । आम्ही जालो गोसावी ॥३॥

गर्जो हरिचे पवाडे । मिळो वैष्णव बागडे ।

पाझर रोकडे । काढू पाषाणामध्ये ॥धृ॥

३१७८ पृष्ठ ५८८(देहूकर सांप्रदायिक),२३०२ पृष्ठ ३९३(शासकीय)

तुका म्हणे ४

आम्ही हरिचे सवंगडे । जुने ठायीचे वेडे बागडे ।

हाती धरुनी कडे । पाठीसवे वागविलो ॥१॥

म्हणोनि भिन्न भेद नाही । देवा आम्हा एकदेही ।

नाही जालो काही । एका एक वेगळे ॥धृ॥

निद्रा करिता होतो पायी । सवे चि लंका घेतली तई ।

वानरे गोवळ गाई । सवे चारित फिरतसो ॥२॥

म्हणोनि भिन्न भेद नाही । देवा आम्हा एकदेही ।

नाही जालो काही । एका एक वेगळे ॥धृ॥

आम्हा नामाचे चिंतन । राम कृष्ण नारायण।

तुका म्हणे क्षण । खाता जेविता न विसंभो ॥३॥

म्हणोनि भिन्न भेद नाही । देवा आम्हा एकदेही ।

नाही जालो काही । एका एक वेगळे ॥धृ॥

२२१७ पृ ३७२ (शिरवळकर), २३०१ पृ ३९२(शासकीय)

तुका म्हणे ३

आम्ही हरिचे सवंगडे । जुने ठायीचे वेडे बागडे ।
हाती धरुनी कडे । पाठीसवे वागविलो ॥१॥
म्हणोनि भिन्न भेद नाही । देवा आम्हा एकदेही ।
नाही जालो काही । एका एक वेगळे ॥धृ॥

निद्रा करिता होतो पायी । सवे चि लंका घेतली तई ।
वानरे गोवळ गाई । सवे चारित फिरतसो ॥२॥
म्हणोनि भिन्न भेद नाही । देवा आम्हा एकदेही ।
नाही जालो काही । एका एक वेगळे ॥धृ॥

आम्हा नामाचे चिंतन । राम कृष्ण नारायण।
तुका म्हणे क्षण । खाता जेविता न विसंभो ॥३॥
म्हणोनि भिन्न भेद नाही । देवा आम्हा एकदेही ।
नाही जालो काही । एका एक वेगळे ॥धृ॥

२२१७ पृ ३७२ (शिरवळकर), २३०१ पृ ३९२(शासकीय)

तुका म्हणे २

आम्ही वैकुंठवासी । आलो या चि कारणासी ।
बोलिले जे ॠषी । साच भावे वर्तावया ॥१॥
झाडू संतांचे मारग । आडराने भरले जग ।
उच्छिष्टाचा भाग । शेष उरले ते सेवू ॥धृ॥

अर्थे लोपली पुराणे । नाश केला शब्दज्ञाने ।
 विषयलोभी मन । साधने बुडविली ॥२॥
झाडू संतांचे मारग । आडराने भरले जग ।
उच्छिष्टाचा भाग । शेष उरले ते सेवू ॥धृ॥

पिटू भक्तीचा डांगोरा । कळिकाळासी दरारा ।
 तुका म्हणे करा । जयजयकार आनंदे ॥३॥
झाडू संतांचे मारग । आडराने भरले जग ।
उच्छिष्टाचा भाग । शेष उरले ते सेवू ॥धृ॥

१००९ पृष्ठ २२९(देहूकर सांप्रदायिक), ५२० पृष्ठ ९७(शासकीय)

तुका म्हणे १

मायारूपें ऐसें मोहिलेंसे जन ।
भोगिती पतन नामाकर्में॥1॥

काय याची प्रीती करितां आदर ।
दुरावितां दूर तें चि भलें ॥2॥

नाना छंद अंगीं बैसती विकार ।
छिळयेले फार तपोनिधि ॥3॥

तुका ह्मणे ऐसें सिकवितों तुज ।
आतां धरी लाज मना पुढें ॥4॥