धूळपेरणी

असो, बरकत धूळपेरणीला,
लागला मातीचा जीव झुरणीला.
हिरव्या पिसांचा ध्यास
घरणीला,
टिपूर मोत्यांची आस मोरणीला.
येऊ नये कधी दिवस जाचक,
कासावीस डोळे बनले चातक.
कोरडे नक्षत्र पूर पापणीला,
आलेलं आभूट दूर दाटणीला
मिळता डोळ्यांना मेघुट इशारे,
मातीच्या कणांना फुटते धुमारे.
- अशोक कौतिक कोळी

हिंमत द्या थोडी !

नका नका मला
देऊ नका खाऊ,
वैरी पावसानं
नेला माझा भाऊ.
महापुरामध्ये
घरदार गेलं,
जुल्मी पावसानं
दप्तरही नेलं.
भांडी कुंडी माझी
खेळणी वाहिली,
लाडकी बाहुली
जाताना पाहिली.
हिंमत द्या थोडी
उसळू द्या रक्त,
पैसाबिसा नको
दप्तर द्या फक्त.
- अशोक कौतिक कोळी

या माझ्या अजाण कवितेचा अपमान

या माझ्या अजाण
कवितेचा अपमान
कां करतां बाबांनो कां ?
प्रेम हवंय का या कवितेचं ?
मग तें मागून मिळणार आहे
का तुम्हांला ?
खूप कांही द्यावं लागेल
त्यासाठी.
काय काय द्याल ?
आत्म्याची बाग फुलवतां येईल
तुम्हांला ?
पण त्यासाठी तुम्हांला तुमचा
आत्मा
तुमच्याच तळहातावर
एखाद्या स्वातीच्या
थेंबासारखा घ्यावा लागेल ,
पण त्यासाठी तुमचे हात
तुम्हांला
चांदण्याहून पारदर्शक करावे
लागतील.
कराल?
माझ्या कवितेपासून मीही,
तिच्याजवळ असून ,
दूर असतों.
भीत भीत स्पर्श
करतों तेव्हा तिचे डोळे
पाणावल्यासारखे चमकतात.
डहुळून जातात त्यांतले
रानचिमणे विभ्रम.
ती एका पोक्त कलेने प्रौढ होते.
या कवितेच्या मुलायम
केसांवरून
सरकून जातात श्यामघनांतले मंद
संधिप्रकाश.
वाटतं की ती आताच उभीच्या उभी
निसटून जाणार आहे
दोन आर्त स्वरांच्या मधल्याच
रिकाम्या स्वर्गांत.
स्पर्श
करतांना अजूनहि मी तेवढा शुद्ध
नाही
एखाद्या बुद्धाच्या
जिवणीवरील उदासीन
हास्यासारखा
या माझ्या अजाण
कवितेच्या वाटेला जाउं नका
कारण ती ज्या वाटा चालते आहे
त्या आहेत
तिच्या स्वत:च्या नागमोडी
स्वभावांतून स्फुरलेल्या.
मोडून पडाल!
तिच्या नावाचा जप
करायचा असेल तर
त्यासाठी तुम्हांला तुमच्या
कण्याच्या मणक्यांचे
रुद्राक्षमणी ओवून
जपमाळ करावी लागेल
आणि श्वासनि:श्वासांचा
करावा लागेल कमंडलू ;
पसरावें लागेल संज्ञेचें
व्याघ्रचर्म.
आहे तयारी ?
ज्या आपल्या वाटा हुडकीत
आल्या वाटेने ;
तिला पाहायचे डोळे प्रथम
मिळवा,
मगच पाहा तिच्याकडे डोकें वर
उचलून.
ती भोगतेय जें जें
कांही त्यांतल्या तिळमात्रही
वेदना
तुम्हांला सोसायच्या नाहीत.
मी स्वत: पाहातोंय स्वत:च्याच
कवितेला
एखाद्या पेटलेल्या
दिव्याप्रमाणे दूर ठेवून.

....आरती प्रभू

प्रेम

एक शुभ्र चिमणी

येते आणि निघून जाते

न सोडता संगीताचं एकही चिह्न...

क्षणभरासाठी

या गहिऱ्या अंधारात

पडून जाते फट

जी पाहता पाहता भरून जाते,

पण माझ्या आत्म्यात

पुन्हा पुन्हा तीच प्रतीक्षा घर करून जाते...

एक शुभ्र चिमणी

येते आणि निघून जाते...

तुझे मौन

तुझ्या

तरल ओठांच्या खाली

एक तीळ आहे

जणू ईश्वराने एखादा

खिळा ठोकला असावा,

जो तुझ्या

प्रत्येक मौनाला

अलौकिक बनवतो.

समर्पण

गवताच्या पात्यासमोर

मी नतमस्तक झालो

आणि मला जाणवलं

मी आकाशाला स्पर्श करतोय....

नदीसाठी २

या एकांतात

कपडे उतरवून

उडी घेईन मी

तुझ्या लहरणाऱ्या पाण्यात.

निर्मळ देह

आणखी निर्मळ होऊन जाईल.

मग आपण दोघे

एकमेकांना सोडून निघून जाऊ.